Sá hann í sláturhúsinu - vissi þá að hann yrði maðurinn minn

Saga Reykjavíkurstúlkunnnar sem fór eftir Verslunarskólanám til Vopnafjarðar til að vinna sem kennari um skamma hríð, en ílengdist og er nú oddviti héraðsins, var efni þáttarins "Um land allt" á Stöð 2 í gærkvöldi.

Þórunn Egilsdóttir býr á Hauksstöðum, innsta bænum í Vesturárdal í Vopnafirði, ásamt eiginmanni sínum, Friðbirni Hauki Guðmundssyni og þremur börnum þeirra. Þau kynntust í kennaraverkfallinu haustið 1984 en Þórunn var þá nýkomin á Vopnafjörð og þekkti ekkert til. Vegna verkfallsins var hún peningalaus og fékk sér vinnu sláturhúsinu og þar sá hún Hauk í fyrsta sinn.

"Þá reyndar vissi ég að hann yrði maðurinn minn," lýsir Þórunn þessari reynslu sinni. "Þar sem ég er að vinna þá sé ég hann og það fyrsta sem mér datt í hug var: Þarna er maðurinn minn. Það var ekkert meira fjarri mér að fara að gifta mig eða eitthvað svoleiðis. Ég ýtti þessu bara frá mér, þetta væri bara bölvuð della. Einhver karl uppi í sveit! Ég var ekki að fara í neitt svoleiðis. En það var alveg rétt hugboð sem ég fékk og við erum búin að vera gift í 25 ár."

Hvort henni hafi ekki þótt skrýtið að fá svona hugboð í sláturhúsi svaraði Þórunn: "Ofboðslega rómantískt," og hlær.

En svo lauk kennaraverkfallinu og um vorið langaði Þórunni til að kynnast sveitinni og var þá sagt að Hauk á Hauksstöðum vantaði kaupakonu: "Og ég kom hingað og ég er líklega síðasta kaupakonan sem giftist húsbóndanum."

Haukur, sem er 18 árum eldri, steig fyrstu skrefin samt varlega í samskiptum við hina ungu kaupakonu, vildi að ekki að hún réði sig fyrr en hún hefði kynnt sér aðstæður. Honum leist samt vel á að ráða hana. "Hún var náttúrlega ágæt í útiverkum," svarar hann, spurður um hvaða kosti hann hefði helst séð við Reykjavíkurstúlkuna. Sjá má þáttinn í heilu lagi hér að ofan.