Styðjum stelpurnar okkar!

Á kvennafrídeginum er mikilvægt að efla og hvetja konur til dáða, ungar sem aldnar, í allri flóru samfélagsins. Íþróttir hafa lengi vel verið vígi karlpeningsins, en tölur um fjölda iðkenda í boltaíþróttum benda til þess að mikil aukning sé hjá stelpum í íþróttum frá því sem áður var.

Íslenskar konur hafa á undanförnum misserum unnið til mikilla sigra á vettvangi íþróttanna og eru þær öflugar fyrirmyndir fyrir íþróttakonur framtíðarinnar. Nú á dögum var Gerpla Evrópumeistari í hópfimleikum, kvennalandslið okkar í handbolta komst á heimsmeistaramót í Brasilíu og skilaði góðum árangri, þá fór kvennalandslið okkar í knattspyrnu á síðasta evrópumeistaramót, en A-landsliði hafði ekki áður tekist það.

Aðsóknartölur og fjármagn í íþróttum á afreksstigi virðist hins vegar ekki endurspegla þann gríðarlega árangur sem stelpurnar okkar eru að ná. Ef aðsókn á íþróttamót og leiki kynja er skoðuð má sjá karlarnir taka mun meira til sín. Leiða má líkur af því að talsvert halli sé á peningahliðina hvað stelpur varðar, sérstaklega ef skoðað eru laun íþróttamann í atvinnumennsku og framlög almennt. Þetta tvennt kann að spila saman, laun og tekjur sem fást af aðsókn. Þetta ójafnvægi þarf að leiðrétta, okkar framlag í því er að sýna stelpunum okkar tilskyldan áhuga og leyfa okkur ekki að gefa neitt eftir í þeim efnum. Það kann að vera óásættanleg viðhorf á 21. öldinni - að samfélagið veiti þegjandi samþykki fyrir því að íþróttir séu nú einkum „karlamál".

Ungar stúlkur sem vaxa nú upp og iðka íþróttir þurfa fyrirmyndir í íþróttum. Þeim á ekki að líða eins og þær séu annars flokks. Sigurður Ragnar Eyjólfsson landsliðsþjálfari hvatti íslensku þjóðina til að sýna A- landsliði kvenna í knattspyrnu stuðning í verki. Við tökum undir þá hvatningu með framangreindum orðum og hvetjum alla til að mæta á völlinn.