Slasaðist á leiðinni til læknis - ríkið ber skaðabótaábyrgð

Héraðsdómur Reykjavíkur dæmdi konu á sjötugsaldri í vil í morgun en hún höfðaði skaðabótamál gegn Ríkissjóði Íslands eftir að hún rann til í bleytu á Landspítalanum við Hringbraut árið 2008. Konan var á leiðinni í læknismeðferð þegar hún rann til. Ekki greint á um meiðsl konunnar, sem hlaut samfallsbrot um miðbik brjósthryggjar og féllu tveir hryggjarliðir saman. Konan var lögð inn á spítalann til verkjastillingar og þar lá hún í sex daga.

Málsforsendur konunnar voru þær að þeir sem sáu um þrif hafi ekki gert nægilega miklar ráðstafanir til þess að koma í veg fyrir tjónið. Þessu mótmælti ríkið og vildi meina að þarna væri um vangá að ræða.

Í niðurstöðu Héraðsdóms Reykjavíkur segir aftur á móti að almennt verði að leggja ríka skyldu á rekstraraðila fasteigna, sem fjöldi fólks leggur leið sína um, og gera ráðstafanir sem sanngjarnar mega teljast til þess að tryggja öryggi þeirra sem þar eiga leið um.

Þegar litið er til þess að Landspítalinn er opinber heilbrigðis­stofnun og að líkamlega veikburða einstaklingar leita þangað vegna þeirrar þjónustu sem hann veitir og að þeir geta ef til vill ekki sótt þá þjónustu annað, eins og í tilfelli konunnar, verður að telja þessa skyldu enn ríkari að mati dómara.

Þá kemur einnig fram að þegar konan hrasaði voru engar merkingar til viðvörunar um bleytu á gólfi og gólfið hafði ekki verið þurrkað eftir að skúringarvél hafði farið þar um.

Viðeigandi ráðstafanir, eins og að setja upp merkingar eða þurrka bleytuna, geta hvorki talist tímafrekar né kostnaðarsamar að mati dómsins. Þannig kemst hann að þeirri niðurstöðu að það verði að meta starfsfólki ríkisins það til gáleysis að hafa ekki gengið svo frá eftir þrif á gangi spítalans að komið yrði í veg fyrir að sjúklingar sem leituðu þangað til meðferðar yrðu fyrir tjóni vegna bleytu á gólfum eftir þrifin.

Skaðabótaskylda ríkisins var því viðurkennd.