Aðstandendum fannst gott að sjá Djúpið

„Ég held að við höfum öll verið sammála um að þetta hafi ekki verið eins erfitt og við héldum," segir Aðalbjörn Þorgeir Valsson, sonur Vals Smára Geirssonar, sem var einn skipverjanna sem fórst með Hellisey við Vestmannaeyjar árið 1984.

Myndin Djúpið eftir Baltasar Kormák verður frumsýnd í kvöld í helstu kvikmyndahúsum landsins. Í gærkvöldi var hinsvegar sérstök sýning fyrir aðstandendur þeirra sem fórust í slysinu. Aðalbjörn Þorgeir var í viðtali í þættinum Í Bítið á Bylgjunni í morgun.

„Myndin er frábær, það verða allir að sjá þessa mynd. Ég hélt að þetta yrði mikið mikið erfiðara og það komu alveg einhver tár á tímabili. En þetta var frábært í alla staði, ég segir fyrir mitt leyti - það var gott fyrir mig að sjá þetta. Við töluðum öll við Baltasar eftir sýninguna í gær og tilkynntum honum að það hefði verið smá hjálp í að horfa á þetta, smá lokun á einhver mál sem einhverjir hafa verið með í öll þessi ár," segir Aðalbjörn Þorgeir.

Hann segir þó að erfitt hafi verið að sjá nokkur atriði í myndinni. „Ég ætla ekki að segja hvaða atriði það eru, ég vil ekki skemma neitt. En það voru eitt til tvö atriði sem mér fannst erfitt að sjá."

„Ég held að allir hafi verið sáttir, ég þori ekki að fullyrða það, en ég held það," segir hann.