Íbúi á Suðurnesjum vann 60 milljónir - en veit það ekki enn

Rétt í þessu var dregið í Milljónaveltu Happdrættis Háskóla Íslands. Í tilkynningu frá Happdrætti Háskóla Íslands stóð veltupotturinn í 60 milljónum króna enda hafði hann ekki gengið út undanfarna fimm mánuði.

Skemmst er frá því að segja að potturinn gekk út að þessu sinni, og féll í skaut ríflega fertugs karlmanns á Suðurnesjum. Vinningurinn kom á trompmiða sem hann hafði átt í nokkur ár, ásamt fleiri miðum. Ekki hefur enn náðst samband við vinningshafann í síma.

Einnig voru dregnir út fimm einnar milljónar króna vinningar, allir á selda miða og gengu þeir því allir út.

Milljónaveltan heldur áfram göngu sinni í október, en verður þá á byrjunarreit. 10 milljónir króna byrja þá að velta og getur potturinn því orðið hæst 30 milljónir í lok ársins, gangi hann ekki út fyrr.