Sveppatínsla á Selfossi - stórhættulegt segir lögreglan

Lögreglan handtók í gærkvöldi 17 ára ungling sem var við sveppatínslu á Selfossi á opnu svæði en þó nokkuð er um að unglingar séu að tína sveppi í bæjarfélaginu þessa dagana. Þá voru tveir menn um þrítugt teknir nú eftir hádegi fyrir sveppatínslu á sama stað og unglingurinn í gærkvöldi.

Lögreglan segir ólöglegt að tína sveppi og að þeir geti verið stórhættulegir og valdið ofskynjunum. Sveppaneysla er mjög tengd kannabisneyslu ungmenna en sveppirnir eru etnir hráir eða þurrkaðir. Stundum er búið til úr þeim te eða þeirra neytt samhliða öðrum fíkniefnum eða notaðir til að setja út í drykki hjá grandalausum ungmennum.

„Við vörum stórlega við sveppaneyslu og hvetjum alla að vera vel á varðbergi gegn slíkri neyslu," sagði Elís Kjartansson, lögreglufulltrúi hjá lögreglunni á Selfossi.