Bandarísku stelpurnar bættu 27 ára heimsmet og 32 ára Ólympíumet

Bandaríska sveitin í 4 x 100 metra boðhlaupi kvenna setti nýtt glæsilegt heimsmet í úrslitahlaupinu á Ólympíuleikunum í London í kvöld. Gamla heimsmetið var svo sannarlega komið til ára sinna því það setti austur-þýska sveitin í Canberra í Ástralíu í október 1985.

Það var ekki nóg með að bandarísku stelpurnar bættu 27 ára heimsmet og 32 ára Ólympíumet í þessu hlaupi því þær hreinlega slátruðu þessu metum. Gamla heimsmet austur-þýsku sveitarinnar var 41,37 sekúndur og Ólympíumetið frá því á leikunum í Moskvu 1980 var 41,60 sekúndur.

Bandaríska sveitin kom í mark á 40,82 sekúndum og bætti heimsmetið um meira en hálfa sekúndu. Sveitina skipuðu þær Tianna Madison, Allyson Felix, Bianca Knight og Carmelita Jeter. Allyson Felix vann áður gullið í 200 metra hlaupinu á leikunum í London og Carmelita Jeter fékk silfur í 100 metra hlaupinu.

Jamaíska sveitin fékk silfur og í úkraínska sveitin tók bronsið en þessar sveitir settu báðar landsmet í þessu hlaupi. Stelpurnar frá Jamaíka hlupu á 41,41 sekúndu og voru því einnig undir gamla Ólympíumetinu.