Yfirleitt næst að semja við foreldrana

Það eru ekki mörg börn sem úthýst er af frístundaheimilum Reykjavíkurborgar vegna skulda foreldra, segir Soffía Pálsdóttir skrifstofustjóri frístundamála hjá skóla- og frístundasviði Reykjavíkurborgar. „Þetta er ekki harðneskjulegt, það er svolítið langur strengurinn hjá okkur af því að við vitum að þetta er málaflokkur sem er viðkvæmur,“ segir hún.

Soffía segir að fólki sé alltaf gefinn kostur á að semja um skuldir við innheimtufyrirtækið sem Reykjavíkurborg á í viðskiptum við. Þegar fyrir liggur að fólk er í greiðslu- og fjárhagsvandræðum sé því beint á þjónustumiðstöðvar Reykjavíkurborgar og þau úrræði sem eru í boði. „Við bendum þeim líka á að frístundakortið er líka styrkur til að standa straum af frístundaheimilakostnaði," segir hún. Hins vegar sé ekki hægt að halda börnum mánuðum saman á frístundaheimilunum án þess að greitt sé fyrir þjónustuna.

„Þannig að eftir ákveðið langan tíma fær fólk tilkynningu um uppsögn en er boðið að gera eitthvað greiðsluamkomulag í gegnum innheimtufyrirtæki sem borgin skiptir við," segir Soffía. Reglur um frístundaheimili séu þannig í samræmi við reglur um leikskóla. Soffía segist ekki vera með það á takteinum núna hvað þetta eru mörg mál, en hún sé búin að kalla eftir upplýsingum um það. „En þau eru ekki mörg," segir Soffía og bætir því við að ansi margir geri samkomulag þegar þeir fá viðvörun.