Fríkirkjuvegur 11 friðaður

Húsið að Fríkirkjuvegi 11 hefur verið friðað í heild sinni. Ytra byrði hússins var friðað á áttunda áratug síðustu aldar en að tillögu Húsafriðunarnefndar var innra byrðið friðað sömuleiðis.

Húsið þykir eðalsteinn íslenskrar byggingalistar. Athafnamaðurinn Thor Jenssen fékk Einar Erlendsson arkitekt til að teikna fyrir sig íbúðarhús sem hann reisti við Fríkirkjuveg 11 árið 1907. Innra byrðið er vitnisburður um hið besta sem gert var á þessu sviði á fyrri hluta 20. aldar, hvort sem um er að ræða frágang á smíðum eða málun, sem unnin var af fyrstu lærðu íslensku málurunum. Það er því talið að um sé að ræða slíka gersemi að allri gerð, að húsið að Fríkirkjuvegi 11 skuli vera friðað í heild sinni.

Núverandi eigandi hússins, Björgólfur Thor, hugðist skipta húsinu í tvö notkunarrými, íbúð og veislusal. Þær hugmyndir féllu ekki beinlínis í kramið og Húsafriðunarnefnd taldi þær rýra gildi hússins. Nú hefur verið fallist á þær röksemdir.