Hversu langt kemst maður á fimm þúsund krónum?

Ferðalangar koma til með að finna fyrir lækkun olíuverðs í sumar þar sem tankurinn dugar lengur nú en fyrir fjórum mánuðum. Fréttastofa kannaði hversu langt hægt er að komast ef tekið er bensín fyrir fimm þúsund krónur.

Fréttastofa hefur reglulega skoðað hvað hversu langt hægt er að aka ef bensín er sett á tankinn fyrir fimm þúsund krónur. Miðað er við bíl sem eyðir níu lítrum á hundraði. Fyrir sex árum var bensínlítrinn töluvert ódýrari en í dag en þá kostaði hann 102 krónur. Sá sem lagði af stað frá Reykjavík komst þá langleiðina á Egilsstaði eða inn í Möðrudalinn

Fall krónunnar hafði mikil áhrif á útsöluverð á bensíni. Árið 2008 var til að mynda aðeins hægt að komast í miðjan Öxnadal fyrir fimm þúsund krónurnar.

Í apríl í fyrra hafði bensín haldið áfram að hækka og aðeins var hægt að komast að Blönduósi. Í febrúar á þessu ári var svo tankurinn tómur við afleggjarann á Hvamstanga. Eftir 193 kílómetra akstur en bensínverð hafði þá rokið upp.

Olíuverð hefur lækkað mikið á alþjóðamörkuðum undanfarin misseri og hafa einhverjar lækkanir skilað sér hingað til lands. Bensínlítrinn kostar nú um 244 krónur. Því hefur á fjórum mánuðum leiðin sem hægt er að aka fyrir fimm þúsund krónurnar lengst á ný eða um 33 kílómetra. Fimm þúsund krónurnar duga því aftur til þess að komast nálægt Blönduósi.