Landsbankinn umsvifamikill í sölu á eignum

Þó Landsbankinn hafi selt fjölmargar eignir sem komu í fang hans við hrunið, er hann enn umsvifamikill þegar kemur að sölu á eignum. Bankinn er nú með 19 bújarðir í sölumeðferð og á enn stóra eignarhluti í tveimur af stærstu fjárfestingafélögum landsins.

Nú tæplega fjórum árum eftir að bankakerfið hrundi til grunna hefur mikið vatn runnið til sjávar þegar kemur að viðskiptum með fyrirtæki sem bankarnir fengu í fangið við hrunið. Landsbankinn hefur ekki síst verið stórtækur í þeim efnum. En það eru miklir hagsmunir undir fyrir skattgreiðendur, sem eru stærstu eigendur bankans.

Frá því að Landsbankinn var stofnaður eftir hrunið, hefur hann selt Hertz bílaleiguna, Límtré Vírnet, Björgun, Formaco, Slippfélagið, Pizza pizza, sem selur Dominos pizzur, Parlogis og Sólningu. Þá seldi bankinn einnig frá sér félagið Vestia sem hélt á eignarhlutum í Vodafone, Plastprent, Skýrr, Teymi, Húsasmiðjunni og Icelandic Group.

Bankinn á enn 40 prósent hlut í Toyota á Íslandi, 28 prósent hlut í fjárfestingafélaginu Eyri Invest, sem meðal annars er stærsti hluthafinn í Marel, og sjö prósent hlut í Stoðum.

Þó bankinn hafi á dögunum selt frá sér 75 prósent hlut í fasteignafélaginu Regin, sem meðal annars rekur Smáralind og Egilshöll, þá á bankinn enn tæplega 30 prósent hlut í Reitum, og allt hlutafé í Laugahúsum og Hömlum þróunarfélagi.

Í sölumeðferð hjá bankanum eru nú jarðir sem áður voru í eigu jarðeignafélagsins Lífsvals, 19 talsins.

Fréttastofa mun á næstu dögum fjalla ítarlega um eignaumsýslu enurreistu bankanna þriggja og það breytta landslag í atvinnulífinu, sem nú blasir við, tæpum fjórum árum eftir hrun fjármálakerfisins.