Færri slys vegna vitundarvakningar ökumanna

Þrjátíu bifhjólamenn slösuðust alvarlega í umferðinni í fyrra miðað við fjörutíu og þrjá árið áður. Fækkunin er meðal annars rakin til vitundavakningar ökumanna.

Þetta kemur fram í nýlegri slysaskýrslu Umferðarstofu fyrir árið 2011. Heildarfjöldi slasaðra og látinna bifhjólamanna á því ári var 74 en árið áður var hann 81. Þetta er um 9% fækkun og hefur þessi fjöldi stöðugt minnkað frá árinu 2008 þegar hann var 107. Einar Magnús Magnússon upplýsingafulltrúi Umferðarstofu segir bifhjólaslys yfirleitt alvarlegri en þegar önnur ökutæki eiga í hlut.

„Þar af leiðandi erum við að sjá stærra hlutfall alvarlegra slysa, en fagnaðarefnið er hins vegar það að núna á síðasta ári þá erum við að sjá 30% fækkun á fjölda alvarlegra slasaðra bifhjólamanna í samanburði við árið á undan, 2010," segir Einar Magnús.

Hægt er að rekja þessa þróun til minni aksturs þar sem eldsneyti hefur hækkað umtalsvert segir Einar Magnús en hann telur einnig að ökumenn séu orðnir meðvitaðri um fjölda bifhjóla í umferðinni en þeim hefur fjölgað um 440% frá aldamótum 2000.

„Og þar af leiðandi held ég að menn hafi meiri vara á sér og við sjáum þetta í ákveðnum tegunda slysa sem rekja mátti fyrst og fremst til þess að bílstjórar voru ekki nægilega meðvitaðir um að bifhjól væru í umferðinni, við erum að sjá fækkun á slíkri tegund slysa."