Íslensk heimili eru eldgildrur

Byggingafræðingur segir mikið vanta upp á að fólk geti komist út úr íbúðum sínum ef eldur kemur upp hérlendis. Kona slasaðist í nótt þegar hún stökk út um glugga á brennandi húsi í Borgarnesi.

Steingrímur Sigurjónsson er byggingafræðingur, sérhæfður í brunamálum. Síðustu þrjá áratugi hefur hann ítrekað bent á að íslensk heimili séu eldgildrur. Mikið vanti upp á að neyðarútgangar séu til staðar og auk þess séu brunastigar nær hvergi.

„Reykskynjarar gera ekki annað en að láta vita af eldi og slökkvitæki virka ekki nema á lítinn eld," segir Steingrímur. „Það vantar alveg hið einfalda atriði að fólk geti komist út úr brennandi húsum."

Hann segir að landsmenn megi ekki aðeins treysta á slökkvilið til að bjarga sér heldur huga sjálft að því hvernig það ætlar að komast út. Slökkvilið getur verið lengi á leiðinni á vettvang og aðgengið getur jafnvel verið slæmt.

Steingrímur bendir á að breytingar á einum glugga íbúðar og brunastigi geti kostað innan við 100.000 kr.