Cruise ætlar í gönguferð á afmælisdaginn

Hollywood stórstjarnan Tom Cruise sem nú dvelur á Íslandi við tökur, ætlar í gönguferð á afmælisdaginn sinn. Þetta kemur fram í viðtali við kappann sem birtist í tímaritinu People í dag. Þar ræðir hann um lífið og tilveruna og hvernig það sé að þurfa að vinna á afmælisdaginn, en Cruise verður fimmtugur þann þriðja júlí næstkomandi.

Þá verður hann staddur norðan heiða við tökur á stórmyndinni Oblivion. Fram hefur komið að Cruise hafi leigt húsið Hrafnabjörg á Vaðlaheiði. Búist var við að Cruise myndi efna til stórveislu í tilefni dagsins en ef marka má viðtalið í People ætlar stjarnan að taka því rólega. „Við verðum á Íslandi á sjálfan afmælisdaginn. Við höfum gaman af gönguferðum og ætlum í nokkrar góðar," segir Cruise en hann er giftur leikkonunni Katie Holmes sem verður að sjálfsögðu einnig hér á landi þegar eiginmaðurinn nær áfanganum.

Cruise segist ánægður með að vera að heiman á afmælisdaginn. „Þegar ég var að vaxa úr grasi var það draumur minn að ferðast um heiminn. Ég verð að vinna (á afmælisdaginn), en það bitnar ekkert á fjölskyldunni. Þrátt fyrir að við höfum bæði mikið að gera þá erum við alltaf saman."