Segir það bull og vitleysu að þingmenn geti keypt sér endurkjör

„Aðeins um þetta, ungir sjálfstæðismenn á Akureyri, það er ekki mánuður síðan þeir ályktuðu á allt annan hátt, þá var þeirra skoðun sú að þingmenn sem ekki styddu þetta verkefni ættu að hugsa sinn gang," sagði Kristján Þór Júlíusson, þingmaður Sjálfstæðisflokksins, um harðorða ályktun Sambands ungra sjálfstæðismanna (SUS) þar sem þeir gagnrýndu Kristján Þór og Tryggva Þór Herbertsson, sem báðir eru þingmenn í Norðausturkjördæmi, fyrir að hafa keypt sér endurkjör á næsta kjörtímabili, eins og það er orðað, með því að samþykkja gerð Vaðlaheiðarganga.

Stjórn SUS er ósátt við þetta, þá helst vegna þess að ríkið, það er að segja skattgreiðendur, muna fjármagna gerð ganganna, sem áætlað er að kosti tæpa 9 milljarða króna.

Kristján Þór hafnar gagnrýni SUS alfarið í viðtali við Reykjavík síðdegis í dag. „Það er grundvallarmisskilningur í þessari ályktun um að þingmenn geti keypt sér endurkjör," sagði Kristján og bætti við: „Það er bull og vitleysa."

Hægt er að hlusta á viðtalið við Kristján í Reykjavík síðdegis hér. Hægt er að lesa ályktun SUS í viðhengi hér fyrir neðan.