Tæpir 1500 manns búnir að kjósa í Reykjavík

Nú hafa 1427 manns greitt atkvæði utan kjörfundar í Reykjavík vegna forsetakosninganna. Á landinu öllu hafa 3093 greitt atkvæði.

Síðasta þriðjudag höfðu 692 kosið í Reykjavík. Því hefur fjöldi greiddra atkvæða í Reykjavík ríflega tvöfaldast á einni viku. Á sama tíma hefur fjöldi greiddra atkvæða á landinu öllu aukist úr 1856 atkvæðum og í 3093 atkvæði.

Utankjörfundaratkvæðagreiðslan hófst 5. maí síðastliðinn. Síðasta fimmtudag var utankjörfundaratkvæðagreiðslan í Reykjavík flutt í Laugardalshöll. Þar er opið alla daga frá kl. tíu á morgnanna til tíu á kvöldin. Síðan atkvæðagreiðslan var flutt í Laugardalshöllina hefur hún aukist nokkuð.

Kosningarnar sjálfar fara fram 30. júní og því eru minna en tvær vikur til stefnu. Utankjörfundaratkvæðagreiðslan mun standa fram á föstudaginn 29. júni, daginn fyrir sjálfar kosningarnar, fyrir þá sem búa á höfuðborgarsvæðinu. Á kjördag verður hins vegar opið frá kl. 10-17 fyrir þá kjósendur sem ekki búa á höfuðborgarsvæðinu.