Í sex mánaða fangelsi fyrir kynferðisbrot gegn 15 ára stúlku

Héraðsdómur Norðurlands vestra dæmdi karlmann í sex mánaða fangelsi í gær fyrir kynferðisbrot gegn fimmtán ára stúlku.

Brotin áttu sér stað í september árið 2010 á heimili mannsins. Hann var ákærður fyrir að hafa í tvígang káfað innanklæða á rassi stúlkunnar, strokið fingrum um klof hennar innanklæða og í kjölfarið stungið fingrunum upp í sig og sagt að stúlkan væri flott, eins og það er orðað í ákæru.

Hann neitaði sök við aðalmeðferð málsins.

Maðurinn stjórnaði hlaupa- og knattspyrnuæfingum fyrir unglinga og var stúlkan að koma til hans eldsnemma að morgni á æfingu þegar hann braut gegn henni.

Í mars á síðasta ári var maðurinn sýknaður í héraðsdómi en dómnum var áfrýjað til Hæstaréttar. Dómur þar féll í október síðastliðnum og var sýknudómurinn ómerktur og málinu vísað heim í hérað aftur.

Maðurinn var einnig dæmdur til að greiða stúlkunni 300 þúsund krónur í bætur.