"Stuð-skip á þurru landi“ - umfjöllun um bari Reykjavíkur

Blaðamenn The Reykjavík Grapevine tóku sig til og báru saman alla bari á Reykjavíkursvæðinu. Útektin birtist í blaðinu í dag. Hver einasti bar fékk einkunn og stutta umfjöllun.

Þrír barir fengu bestu mögulegu umsögn, fimm stjörnur af fimm mögulegum. Það voru Kex Hostel, Kaffibarinn og Hótel Holt. Kaffibarinn er rómaður fyrir töff viðskiptavini og sjúskaða stemningu. Kex Hostel og Hótel Holt þykja meira kósý, stemningin afslöppuð og innréttingar flottar.

Tveir staðir reka lestina. Það eru Glaumbar í Tryggvagötu og Bar 7 á Frakkastíg með eina stjörnu af fimm mögulegum. Bar 7 þykir ómerkilegur og skítugur, opnunartímar óútreiknanlegir og fólki ráðlagt að sækja staðinn aðeins til að kaupa bjór í því skyni að drekka utandyra á leiðinni á næsta stað. Glaumbar þykir ómerkilegur staður og fær umsögnina „stuð-skip á þurru landi" (e. party-boat on dry land).

Skríbentar The Reykjavík Grapevine minna á að dómur þeirra er ekki óumdeilanlegur. Úttektin er aðallega hugsuð til skemmtunar og til að skapa umræður um bari Reykjavíkur. Ef einhver er ósammála úttekt blaðsins er hann að lokum sérstaklega hvattur til að senda kvörtunarbréf á The Reykjavík Grapevine.

Alls fengu um fimmtíu barir umsögn og einkunn.

Umsögnina í heild má skoða fyrir miðju blaði á þessum tengli.