Síminn bjargaði hjónum í sjálfheldu

„Það var nú eiginlega bara heppni að ég við vorum með síma,“ segir Elísabet Ósk Vigfúsdóttir, sem var bjargað ásamt manni sínum úr sjálfheldu á Helgafelli í gær. Um 20 björgunarsveitarmenn tóku þátt í að bjarga þeim.

Hjónin eru vant göngufólk og hafa gengið á Helgafellið oft. En í þetta sinn ákváðu þau að fara óhefðbunda leið. „Þegar við komum upp að fellinu vorum við orkulaus og löt og nenntum ekki að labba alla leið upp á fellið,“ segir Elísabet.

Þau hafi því gengið aðra leið en venjulega og áður en þau vissu af voru þau föst. "Við komumst svo ekkert lengra - þá byrja ég að panikka því ég var svo óörugg að komast niður,“ segir hún og eftir að hafa skoðað aðstæður betur var það ljóst að þau voru föst.

„Maðurinn minn hafði skilið sinn síma eftir og ég hugsaði úti í bíl: „Æi, best að skila símann eftir víst við erum ekkert að fara alveg upp.“ En af gömlum vana stakk ég honum í vasann.“

Þau náðu því að hringja á hjálp. „Eftir þetta mun ég aldrei fara neitt án þess að taka símann með mér,“ segir hún.

Elísabet var í viðtali við Reykjavík síðdegis á Bylgjunni í dag. Hægt er að hlusta á viðtalið hér að ofan.