Vill samráðs við stéttina til að leysa vandann

Niðurskurður í heilbrigðiskerfinu virðist á góðri leið með að ganga af heimilislækningum dauðum. Þetta segir formaður félags íslenskra heimilislækna sem krefst samráðs við stéttina svo hægt sé að leysa vandann.

„Í kringum 1990 var hver einasta staða heimilislækna mönnuð hér á landi. Í dag um 20 árum síðar er öldin önnur og heilu landshlutarnir án fastra lækna."

Þetta er á meðal þess sem fram kemur í leiðara nýjasta tölublaðs Læknablaðsins. Hann skrifar Þórarinn Ingólfsson, formaður Félags íslenskra heimilislækna. Þar tekur hann nýlegt dæmi af því þegar sjö stöður heimilislækna voru auglýstar hjá heilsugæslu höfuðborgarsvæðisins. Enginn sótti um.

„Ég skrifaði þessa grein til þess að vekja athygli á því að okkur finnst ekki staðinn vörður um þau réttindi fólks að hafa lækni sem þau geta treyst og náð auðveldlega í. Heimilislækni sem þekkir til fjölskyldunnar og þeirra heilsufarsvanda og getur sett þeirra mál í farveg," segir Þórarinn.

Að sögn Þórarins eru heimilislæknar hér á landi um 190 í dag. Að hans mati vantar að manna um 40 stöður á landsbygðinni og 35 til 50 á höfuðborgarsvæðinu ef vel ætti að vera. Fáir sækja í greinina og eldri læknar snúa sér að öðru. Hann segir brýnt að bregðast við.

„Ég held að fyrsta sem við verðum að gera og heilbrigðisyfirvöld verða að gera er að viðurkenna að þetta sé vandamál. Næsta skrefið er svo að tala við fagfélag lækna um hvernig ætti að leysa þetta. Við vitum að það er takmarkað fjármagn og að þetta verður ekki leyst á einni nóttu," segir hann.