Íhugar málsókn vegna viðtals í Mannlífi

Björn Bjarnason, fyrrum dómsmálaráðherra, íhugar að stefna rithöfundinum Einari Kárasyni og Jóhannesi Jónssyni, oft kenndan við Bónus, vegna viðtals sem Einar tók við Jóhannes í tímaritinu Mannlíf fyrir skömmu.

Á vefsíðu sinni segir Björn að í viðtalinu segi að hann hafi sem ráðherra birt „níð" um hann og fjölskyldu hans og „uppnefnt" þau. „Hvort tveggja er alrangt. Vegna málaferla Jóns Ásgeirs út af leiðréttri ritvillu og héraðsdóms honum í vil hvarflar að mér að stefna þeim Einari og Jóhannesi auk útgefanda Mannlífs, krefjast ómerkingar og miskabóta. Fordæmi í héraðsdómi liggur fyrir um að engu skipti hvort leiðrétt sé eða beðist afsökunar, raunar ólíklegt að nokkur sem stendur að þessu viðtali í Mannlífi geri það," segir Björn.

Á vefsíðu sinni tekur hann jafnframt fram að Einar hafi á sínum tíma ritað ævisögu Jóns Ólafssonar í Skífunni og hafi á tíma Baugsmálsins, svokallaða, tekið upp hanskann fyrir Baugsmenn.

Vefsíðu Björns má lesa hér.