Fylgst verður með aðsetrum dæmdra kynferðisbrotamanna

Unnt verður að fylgjast með dvalarstað þeirra sem dæmdir hafa verið fyrir kynferðisbrot gegn börnum í framtíðinni. Barnaverndastofa mun sjá um eftirlitið og vinnur að verkferlum um það hvernig slíku eftirliti verður háttað. Þá stendur jafnframt til að breyta hegningarlögum þannig að unnt verði að dæma kynferðisbrotamenn til meðferðar. Barnaverndalögum var breytt í fyrra með slíka heimild í huga en Álfheiður Ingadóttir, formaður velferðarnefndar Alþingis, segir að enn eigi eftir að breyta almennum hegningarlögum til þess að skýra löggjöfina. Málið var rætt á fundi nefndarinnar í morgun með fulltrúum frá velferðarráðuneyti, innanríkisráðuneyti og Barnaverndastofu.

„Eins hefur Barnaverndastofa, frá því að gerð var breyting á lögunum í fyrrra, verið að vinna verkferla sem tryggir það að upplýsingar frá Ríkissaksóknara um menn sem hafa hlotið refsidóm fyrir brot gegn börnum berist Barnaverndastofu og jafnframt að þau fái upplýsingar frá Fangelsismálastofnun úr sakaskrá um upphaf og lok afplánunar," bætir Álfheiður við. Hún segir að markmiðið sé að Barnaverndastofu verði unnt að fylgjast með aðsetri dæmdra kynferðisbrota gegn börnum á hverjum tíma þegar það þykir réttmætt vegna hagsmuna barnsins. Mönnum sé að vísu heimilt að breyta um nafn þótt þeir hljóti dóm. Hins vegar geti þeir ekki breytt um kennitölu og því sé möguleikinn á að fylgjast með þeim alltaf fyrir hendi.

Álfheiður segir að frumvarp um breytingar á hegningarlögum verði lagt fram næsta haust. Um verði að ræða víðtækar breytingar á lögunum þar sem jafnframt verði kveðið á um þessi atriði sem varða kynferðisbrot gegn börnum. „Innanríkisráðuneytið er að vinna frumvarp sem gerir ráð fyrir því að dómstólar geti dæmt menn til tiltekins eftilits eftir að afplánun lýkur. Nefndin mun fá þau frumvarpsdrög til skoðunar þegar þau liggja fyrir," segir Álfheiður í samtali við Vísi.