Hefðum átt að endurskoða færri kafla

Guðlaugur Þór Þórðarson, þingmaður Sjálfstæðisflokksins, segir að réttara hefði verið að endurskoða færri kafla stjórnarskrárinnar og skýra þá vel en að skrifa hana alla upp á nýtt.

Hann telur frumvarp stjórnlagaráðs óskýrt á köflum og það bjóði upp á fjölda málaferla. Sem dæmi tekur hann ákvæði um heilbrigðisþjónustu. Þar segir m.a. að allir eigi rétt til andlegrar og líkamlegrar heilsu og fullnægjandi heilbrigðisþjónustu. „Þá getur maður sem er búinn að bíða eftir aðgerð í níu mánuði bara sagt: Heyrðu þetta er ekki fullnægjandi. Ég fer í mál," segir Guðlaugur.

„Réttara hefði verið að taka þá þætti stjórnarskrárinnar sem mestar deilur eru um og skýra þá vel. Menn eru t.d. ekki sammála um hlutverk forseta í stjórnarskránni," segir Guðlaugur sem er þeirrar skoðunar að réttast hefði verið að taka nokkra kafla stjórnarskrárinnar og skýra vel en láta gömlu stjórnarskrána standa að öðru leyti.

Á Alþingi í gær fjallaði Guðlaugur um deilur um þingrofsrétt forseta og sagði að þingmenn hefðu átt að nota líðandi kjörtímabil til að skýra betur þá þætti stjórnarskrárinnar sem eru hvað óljósastir. Með því átti hann við að breytingarnar hefðu með réttu átt að vera umfangsminni og markvissari.