Sigla til Reykjavíkur til að mótmæla

Tugir fiskiskipa munu á morgun sigla af landsbyggðinni og til Reykjavíkur til að mótmæla frumvörpum stjórnvalda um veiðigjöld og stjórn fiskveiða. LÍÚ stendur fyrir samstöðufundi klukkan 16:00 á Austurvelli.

„Við erum alltaf að reyna að ná eyrum stjórnvalda," segir Hlynur Sigurðsson, forstöðumaður upplýsinga- og kynningamála hjá LÍÚ. Fundurinn á Austurvelli verður liður í þeim tilraunum. Skip LÍÚ hafa legið við bryggju í vikunni til að vekja athygli stjórnmálamanna á óánægju starfsfólks í sjávarútvegi með frumvörpin. Eftir fundinn á morgun munu mörg skip halda beint til veiða.

Að gefnu tilefni tekur Hlynur fram að sjómenn eru ekki skikkaðir til að taka þátt í mótmælaaðgerðunum á Austurvelli. „Einhver skip munu halda til veiða eftir fundinn og sigla beint út frá Reykjavík. Þar af leiðandi verða sjómenn að mæta í skipið og sigla til Reykjavíkur," segir Hlynur en leggur áherslu á að öllum sé í sjálfvald sett hvort þeir mæta á Austurvöll og mótmæla.