Áfram spáð blíðu

Áfram er spáð blíðskaparveðri á landinu í dag og að hitinn geti sumstaðar farið upp í 20 stig. Þó verður mun kaldara ef þokubakkar ná inn á ströndina. Þrátt fyrir blíðuna í gær og góðar horfur í dag, náði aðeins að frjósa í nótt á Fjarðarheiði og Breiðdalsheiði fyrir austan, en á sama tíma var hátt í 13 stiga hiti á sunnanverðum Vestfjörðum.

En það er víðar gott veður þessa dagana því hitamet mældust á nokkrum stöðum á sunnan- og vestanverðu Grænlandi í gær, þegar hitinn fór upp í rúm 24 stig. Þar með var liðlega 20 ára met slegið á þessum slóðum.