Góða veðrið draumur fyrir frjókornin

Magn birkifrjókorna í lofti í Reykjavík síðustu daga hefur verið langt yfir meðaltali. Veðuspá næstu daga veitir frjókornum fullkomnar aðstæður til að dreifa sér.

Birkifrjó á landinu hafa tekið við sér í góða veðrinu og því eðlilegt að þeir sem þjást af frjókornaofnæmi finni fyrir því. Á vefsíðu Náttúrufræðistofnunar má fylgjast með gangi mála en samkvæmt mælingum hefur magn þeirra í lofti síðustu sjö daga verið langt yfir meðaltali. Til að mynda losaði um og yfir hundrað frjó í rúmmetra lofts bæði föstudag og laugardag en meðaltal síðustu tuttugu ára eða svo er hins vegar ekki nema rétt yfir tuttugu.

Í Fréttablaðinu í dag segir Margrét Hallsdóttir, jarðfræðingur hjá Náttúrufræðistofnun að magn frjóa nái þó hámarki síðar í ár en hin fyrri og er það helst um að kenna kuldakastinu í byrjun mánaðar. Veðrið undanfarna daga og það sem er spáð næstu daga, hægur vindur, hiti og þurrt loft, veitir frjókornum hins vegar fullkomnar aðstæður til að dreifa sér. Birkitrén eru nú tilbúin að sleppa frjóum en þau eru á misjöfnu þroskastigi eftir svæðum. Í Elliðaárdal er lengra síðan að blómin voru tilbúin á birkinu en í Urriðaholti er birkið rétt að byrja að springa út.

Fólk með grasofnæmi þarf þó ekki að hafa áhyggjur af grasfrjóum strax því þau blómstra yfirleitt ekki fyrr en síðla júnímánaðar. Það getur samt sem áður byrjað að undirbúa sig með því að slá grasið í görðum sínum áður en blómin á því springa út og fara að dreifa frjókornum.