Helmingur ökumanna óku of hratt á Hjarðarhaga

Brot 16 ökumanna voru mynduð á Hjarðarhaga í Reykjavík í gær. Fylgst var með ökutækjum sem var ekið Hjarðarhaga í austurátt, við Tómasarhaga.

Í tilkynningu frá lögreglu segir að á einni klukkustund eftir hádegið hafi 34 ökutæki farið leiðina og því hafi næstum helmingur ökumanna, eða 47%, ekið of hratt eða yfir afskiptahraða. „Meðalhraði hinna brotlegu var 43 km/klst en þarna er 30 km hámarkshraði. Sá sem hraðast ók mældist á 51.

Vöktun lögreglunnar á Hjarðarhaga er liður í umferðareftirliti hennar á höfuðborgarsvæðinu. Við fyrri hraðamælingar lögreglunnar á þessum stað hefur brotahlutfallið verið 39-46%."