Þriðjungur ók of hratt í Rofabæ

Brot 20 ökumanna voru mynduð í Rofabæ í Reykjavík í dag. Fylgst var með ökutækjum sem var ekið Rofabæ í vesturátt, við Árbæjarskóla.

Í tilkynningu frá lögreglu segir að á einni klukkustund, fyrir hádegi, hafi 66 ökutæki farið þessa akstursleið og því hafi næstum þriðjungur ökumanna, eða 30%, ekið of hratt eða yfir afskiptahraða.

„Meðalhraði hinna brotlegu var 44 km/klst en þarna er 30 km hámarkshraði. Sá sem hraðast ók mældist á 51.

Vöktun lögreglunnar í Rofabæ er liður í umferðareftirliti hennar á höfuðborgarsvæðinu. Við fyrri hraðamælingar lögreglunnar á þessum stað hefur brotahlutfallið verið 49-60%," segir í tilkynningu.