Áhlaup á Landsbankann

Á annað hundrað manna gerði áhlaup á Landsbankann á Fáskrúðsfirði í dag, að sögn þátttakenda, til að mótmæla lokun útibúsins. Einn þeirra segir gríðarlega reiði meðal bæjarbúa.

Landsbankinn tilkynnti fyrir fáeinum dögum að loka ætti frá og með morgundeginum í hagræðingarskyni útibúum bankans í Grundarfirði, á Króksfjarðarnesi, Súðavík, Flateyri, Bíldudal, Eskifirði og Fáskrúðsfirði. Þetta hefur vakið hörð viðbrögð, einn maður kom rétt fyrir lokun í útibúið á Króksfjarðarnesi og neitaði að fara fyrr en hann hefði fengið innistæðuna sína útgreidda. Ekki var nægur peningur til en það bjargaðist á tæpum klukkutíma.