Ökumaður ákærður fyrir manndráp af gáleysi

Átján ára piltur sem ákærður er fyrir manndráp af gáleysi eftir að hafa orðið Eyþóri Darra Róbertssyni að bana við ofsaakstur, mótmælti ákærunni fyrir dómi í morgun. Í ákæru segir að hann hafi einnig stofnað vegfarendum í hættu „á ófyrirleitinn hátt."

Móðir Eyþórs Darra mætti við þingfestinguna í morgun ásamt bróður hans og ömmu.

Pilturinn, sem var góður vinur Eyþórs, er ákærður fyrir að hafa í ágúst á síðasta ári ekið, próflaus, langt yfir leyfilegum hámarkshraða. Í ákæru segir að ætlaður hraði sé 119 kílómetrar á klukkustund, mögulegur lágmarkshraði sé 102 en mögulegur hámarkshraði 136 kílómetrar á klukkustund. Leyfilegur hámarkshraði var 50.

Ákærði mótmælir því að hafa verið á þessum hraða og skilar lögmaður hans greinargerð með skýringum þegar aðalmeðferð hefst, en skipaður verjandi piltsins er Brynjar Níelsson.

Pilturinn missti stjórn á bílnum, rakst á stóran stein, og loks á húsvegg. Við áreksturinn hlaut Eyþór Darri alvarlega höfuðáverka sem voru blæðingar, mar og bjúgur í heila, mar á höfðu, höfuðkúpubrog og algjört heiladrep. Hann lést á sjúkrahúsi tveimur dögum síðar.

Steinninn sem bíllinn rakst á sést í meðfylgjandi myndskeiði. Hann er tæpt hálft tonn, og kastaðist 5,6 metra á húsvegginn. Hann var færður aftur til baka með krana.

Í ákæru segir að með háttsemi sinni hafi pillturinn stofnaði lífi og heilsu annars farþega bílsins "í augljósa hættu" og raskað umferðaröryggi go öryggi vegfarenda "á ófyrirleitinn hátt."

Móðir Eyþórs Darra treysti sér ekki til að tjá sig um málið að svo stöddu. Foreldrar Eyþórs Darra fara hvort um sig fram á þrjár milljónir króna í miskabætur.

Aðalmeðferð málsins fer fram í lok júní.