Björgunarmenn komnir í Aðalvík - maðurinn með meðvitund

Björgunarmenn eru nú komnir að manninum sem féll við eggjatöku í Aðalvík á Hornströndum. Maðurinn, sem hrapaði um 10 til 20 metra, er með meðvitund.

Samkvæmt Jónasi Guðmundssyni hjá Landsbjörgu hafa björgunarmennirnir nú búið að sárum mannsins og verður hann fluttur í björgunarbát.

Báturinn mun síðan sigla að Sæbóli. Því næst mun þyrla Landhelgisgæslunnar koma manninum undir læknishendur.

Samkvæmt Jónasi eru aðstæður góðar á svæðinu.

Slysavarnarfélaginu Landsbjörgu barst tilkynning um málið klukkan hálf fjögur í dag. Björgunarskip frá Ísafirði voru þá kölluð út ásamt hraðskreiðum björgunarbátum. Þá flutti þyrla Landhelgisgæslunnar sérhæfða fjallabjörgunarmenn á staðinn frá Reykjavík.