Morðkvendi handtekið í eigin brúðkaupsveislu

Kona ein í Rússlandi var handtekin á dögunum grunuð um morð. Það sem gerir málið athyglisvert er að hin 22 ára gamla kona var handsömuð í miðri brúðkaupsveislu. Og það sem meira er, hún var sjálf brúðurin.

Lögregla segir að konan hafi aðeins nokkrum klukkutímum fyrir brúðkaupið ráðist á 45 ára gamlan mann og barið hann til bana. Hún vildi meina að hann skuldaði henni peninga. Hann lést í garði konunnar og brúðguminn, sem var dauðadrukkinn, mun hafa horft á aðfarirnar án þess að aðhafast nokkuð.

Þau létu verknaðinn heldur ekki aftra sér frá því að láta pússa sig saman en brúðkaupsferðinni hefur hinsvegar verið frestað um óákveðinn tíma.