Blóðbað í Sýrlandi

Þjóðarráðið í Sýrlandi, stærstu samtök andspyrnumanna í landinu, hafa farið fram á að Öryggisráð Sameinu Þjóðanna komi saman vegna atburðanna í bænum Houla í Homs-héraði í nótt.

Að minnsta kosti 90 manns létust í árásum stjórnarhersins á borgina að sögn Þjóðarráðsins. Þá er talið að helmingur látinna séu börn.

Fólkið lést bæði í stórskotaárás stjórnarhersins á borgina og þegar fótgönguliðar gerðu atlögu að henni.

Fregnir hafa borist af því að hermennirnir hafi tekið heilu fjölskyldurnar af lífi. Þjóðarráðið krefst þess að Öryggisráðið fundi um málið.

Reynist þetta vera rétt erum ein blóðugustu átök síðan vopnahlé hófst í landinu í apríl.

Ban Ki-moon, framkvæmdastjóri Sameinuðu Þjóðanna, segir að málið sé grafalvarlegt. Þá segir hann að mikil hætta sé á að borgarastyrjöld brjótist út í landinu.