Fordæma fjöldamorð en deila um aðgerðir

Öryggisráð Sameinuðu þjóðanna fordæmdu í gærkvöldi fjöldamorð ríkisstjórnarinnar í Sýrlandi í borginni Houla. Talið er að hundrað óbreyttir borgarar hafi verið myrtir af hermönnum stjórnarinnar í borginni á föstudaginn.

Enn er þó hart deilt um það hvað skal gera, en utanríkisráðherra Bretlands,. William Hague, sagði á blaðamannafundi eftir að ákvörðunin var tilkynnt, að Bretar hefðu mjög skýra afstöðu til Bashar al Assad Sýrlandsforseta, þar er krafist tafarlausrar afsagnar leiðtogans. Þessu mótmælti Sergei Lavrov, utanríkisráðherra Rússlands, á sama fundi. Hann sagði það ekki skipta máli hvort sýrlandsforseti viki, krafan væri sú að ofbeldinu linnti.

Kofi Annan hyggst halda til Sýrlands á morgun og koma á friðarviðræðum við stríðandi fylkingar. Vonir standa til að starfsmenn Sameinuðu þjóðanna geti í kjölfarið rannsakað fjöldamorðin.