Ragna og Kári Íslandsmeistarar í badminton

Ragna Ingólfsdóttir og Kári Gunnarsson urðu í dag Íslandsmeistarar í einliðaleik í badminton. Ragna var að vinna í níunda skipti, sem er met, en Kári var að vinna sinn fyrsta titil í einliðaleik.

Ragna var mjög fljót að vinna Snjólaugu Jóhannsdóttur í tveimur lotum. Snjólaug að spila sinn fyrsta úrslitaleik og hafði ekkert í Rögnu að gera.

Magnús Ingi Helgason virtist ekki koma nógu vel stemmdur til leiks því hann var nær meðvitundarlaus í fyrstu lotunni sem Kári vann, 21-7.

Magnús Ingi var búinn að ranka við sér í annarri lotu og náði þar fínni forystu, 9-3. Kári saxaði smám saman á forskotið og komst yfir undir lokin og landaði sætum sigri í lotunni, 21-19, og þar með Íslandsmeistaratitlinum.