Auglýstu á Netinu eftir eggjagjafa

Hundrað manns bíða eftir því að komast í tæknifrjóvgun og getur oft verið erfitt að finna egg. Barnlaust par um fertugt sem bíður eftir tæknifrjóvgun ákvað að auglýsa á Netinu eftir eggjagjafa. Þau segja að sitt hjartans mál sé að eignast barn saman og það hafi þau reynt í nokkur ár.

„Nýlega komumst við að því að til að það geti orðið þá þurfum við að fá gjafaegg frá einhverri góðhjartaðri konu á aldursbilinu 25-35 ára. Helstu upplýsingar um eggjagjöf má sjá á heimasíðu Art Medica með því að smella á þennan hlekk," segja þau á vefsíðunni.

Þau segja að ástæðan fyrir því að þau séu að auglýsa eftir gjafaeggi sé sú að það sé langur biðlisti hér á landi og þau langi til að reyna að stytta þá bið fyrir okkur og önnur pör sem eru í sömu aðstöðu.

„Ef þessi auglýsing vekur athygli þína og áhuga getur þú haft samband við Art Medica í Kópavogi (s. 515-8100, ritarar@artmedica.is) og þau myndu góðfúslega fræða þig um allt eggjagjafa ferlið. Taka þarf fram þetta númer: E7913 til þess að tengja þessa auglýsingu við eggjagjöfina ef af henni verður svo við getum notið góðs af henni," segir á vefsíðunni.