Ökuníðingur á mótorhjóli enn ófundinn

Lögreglan hefur enn ekki handsamað mann sem ók mótorhjóli á ofsahraða eftir Hafnarfjarðarvegi fyrir um tveimur vikum. Lögreglumaður sem veitti honum eftirför á mótorhjóli missti stjórn á hjóli sínu við Kópavogslæk svo hjólið hafnaði úti í læknum.

Lögregla leitar enn mannsins, sem ók á svörtu mótorhjóli. Hún hefur óskað eftir vitnum að slysinu en hefur engin viðbrögð fengið við því.

Lögreglumaðurinn sem veiti mótorhjólamanninum eftirför slapp ótrúlega vel þegar hann kastaðist af sínu hjóli og er að sögn lögreglu aftur mættur til vinnu. Mótorhjólið er hins vegar stórlaskað en það þurfti að hífa upp úr Kópavogslæk með krana.

Ef lögreglan kæmi höndum yfir ofsaakstursmanninn yrði hann að öllum líkindum ákærður fyrir umferðarlagabrot. Hann yrði hins vegar ekki dreginn til ábyrgðar fyrir að lögreglumótorhjólið hafnaði úti í læk.

Ökumaður svarta mótorhjólsins er hvattur til að gefa sig fram. Talið er að hjólið (racer) sem hann var á sé mögulega af gerðinni Yamaha R1 árgerð 2004-2008 eða Kawasaki ZX-10R Ninja árgerð 2006 eða 2007. Á því eru líklega rauðar strípur eða stafir. Ökumaðurinn var í túbugalla, sennilega svörtum að lit.

Þeir sem hafa upplýsingar um atvikið geta haft samband við lögreglu í síma 444-1000 en einnig má senda upplýsingar í tölvupósti á netfangið abending@lrh.is.