Til stendur að leita að þeim sem kveiktu eldana

Sveitarstjórnin í Súðavík í samstarfi við lögreglu mun hefja leit að þeim sem ollu sinueldunum sem brunnið hafa í Laugadal í Ísafjarðardjúpi að undanförnu. Að sögn sveitarstjóra er markmiðið frekar að varpa ljósi á það sem gerðist heldur en að gera viðkomandi aðila bótaábyrga. Sveitarfélagið mun þó kanna réttarstöðu sína gagnvart aðilunum.

Ómar Már Jónsson, sveitarstjóri í Súðavíkurhreppi, telur að kostnaðurinn sem hefur hlotist af slökkvistörfunum sé nú um sjö milljónir króna. Þá er ekki meðtalinn kostnaður við þyrlu Landhelgisgæslunnar sem var á svæðinu á miðvikudaginn var, enda verður litið á það sem æfingaflug fyrir þyrluna og Landhelgisgæslan mun því standa straum af öllum þeim kostnaði.

Kostnaðurinn mun að líkindum lenda á Súðavíkurhreppi. Ómar hefur þó óskað eftir því að innanríkisráðuneytið hlaupi undir bagga með sveitarfélaginu. Starfsmenn þar segja að slík bón verði tekin til skoðunar í ráðuneytinu.

Nú er talið að eldurinn hafi kviknað 2. ágúst út frá grilli. Talið er að einhverjir aðilar hafi verið að veiðum í Laugabólsvatni í leyfisleysi þann dag. „Það eru vitni að því að eldur hafi kviknað þá út frá grilli. Þeim tókst þá að slökkva, en líklega ekki nógu vel með þeim afleiðingum að eldurinn tók sig upp daginn eftir," segir Ómar en segir að enn sé ekki vitað hverjir þarna voru að verki. „En við erum byrjaðir að fikra okkur að því marki að finna þá," segir hann.

Ómar telur mikilvægt að reynt verði að draga lærdóm af atburðunum. Ef viðbragðsáætlun við sinueldum hefði verið til staðar hefði mögulega mátt kæfa eldana í fæðingu. „Við horfðum t.d. á ákveðnum tímapunkti yfir svæðið. Það var hvergi eldur og við héldum að þessu væri lokið. Svo hvessir og þá bara kraumar svæðið," segir Ómar. Hann grunar að það hefði verið til bóta ef menn hefðu haft viðbragðsáætlun tiltæka.