Póstkössum breytt vegna sprengjuvarga

Síðastliðin ár hefur Pósturinn læst póstkössum sem staðsettir eru utanhúss á höfuðborgarsvæðinu yfir áramót.

Þetta er gert vegna ítrekaðra skemmda sem unnar eru á póstkössunum í kringum áramót. Læsingin virkar þannig að hægt er að koma einu bréfi ofan í kassann í einu en ekki opna hann það mikið að hægt sé að koma þykkari bréfum í kassann.

Viðskiptavinum er bent á næsta pósthús eða póstkassa sem staðsettir eru innandyra t.d. í verslanamiðstöðvum. Hægt er að finna upplýsingar um póstkassa og afgreiðslustaði á postur.is eða í snjallsímaforriti Póstsins.

Þá hefur Fréttablaðskassa í sumum sveitarfélögum verið komið í var svo sprengjuóðir komist ekki í þá. Þannig verður ekki hægt að nálgast Fréttablaðið í hefðbundnum kassa í Grindavík. Hins vegar er hægt að nálgast Fréttablaðið í íþróttahúsinu, sundlauginni, Þorbirni, Vísi og Olísbúðinni. Kassarnir fara aftur upp þann 7. janúar á nýju ári.