Framkvæmdir við Stúdentakjallarann skotganga

Framkvæmdir við Stúdentakjallarann skotganga. Frá því í júní hafa verktakar unnið á svæðinu og nú á föstudaginn var staðan á framkvæmdunum svona. Stefnt er að því að Stúdentakjallarinn opni 1. desember með pompi og prakt. Sara Sigurðardóttir, formaður Stúdentaráðs HÍ, segir að þó það sé smá klikkun að opna bar fyrir háskólanemendur nokkrum dögum fyrir lokapróf verði staðurinn líklega kærkomið afdrep fyrir prófþreytta háskólanema.

„Þetta verður náttúrlega líka veitingastaður fyrr á daginn," segir Sara en stefnan er sú að bjóða upp á gott kaffi og spennandi matseðil. Þannig verður staðurinn valkostur við Hámu, matsöluna í Háskólatorgi.

Staðurinn verður ódýr, enda rekinn af Félagsstofnun stúdenta. „Það er náttúrlega í þeirra lögum að þau mega ekki skila hagnaði. Þannig að þetta verður eins hagstætt og hægt er," segir Sara.

Framkvæmdirnar hafa gengið með undraverðum hraða að sögn Söru. „Fólk er alltaf í sjokki að sjá hversu mikilum árangri þessir verktakar ná á einni viku," segir Sara.