Varast gullgrafaraástand í ferðaþjónustu

Ör fjölgun ferðamanna hér á landi er verkefni sem nauðsynlegt er að horfast í augu við, að mati Ólínu Þorvarðardóttur, þingmanns Samfylkingar.

„Það er mikill ágangur á vinsæla staði og nýleg skýrsla sýnir að það er vaxandi óánægja meðal ferðamanna með mannmergðina,“ segir Ólína. „En þetta verður að vera sameiginlegt verkefni stjórnvalda og ferðaþjónustunnar.“

Að mati Ólínu verður ferðaþjónustan í landinu að horfast í augu við að það sé ekki einungis verkefni stjórnvalda að byggja upp þá auðlind sem Ísland er fyrir ferðamenn. Brýnt sé að halda nánu samstarfi beggja aðila í uppbyggingu ferðamannastaða.

„Ég held að ferðaþjónustan þurfi að taka sér tak og leggja sitt af mörkum. Stjórnvöld hafa verið að sinna þessum málum, meðal annars með átökum til að tryggja jafnari dreifingu ferðamanna yfir árið,“ segir hún. „En það má ekki ríkja gullgrafaraástand í ferðaþjónustunni, sem að mínu mati hefur verið ákveðin tilhneiging til.“

Erna Hauksdóttir, framkvæmdastjóri Samtaka ferðaþjónustunnar, segir nauðsynlegt að fá frekara fjármagn frá stjórnvöldum inn í framkvæmdir við vinsælustu staðina á landinu.

„Auðvitað er nauðsynlegt að hafa þessa hluti í lagi. En það kostar peninga og það hefur því miður ekki verið sett mikið í rannsóknir eða uppbyggingu á ferðamannastöðum,“ segir hún. „Þetta eru gríðarlega mikilvæg mál. Þegar ferðaþjónustan er orðin svona öflug verður stjórnsýslan að taka það alvarlega og setja peninga í hana eins og hefur verið gert við aðrar atvinnugreinar.“ - sv