Stjórnarflokkarnir takast á um kvótann

Hvað tefur frumvarp um breytingar á fiskveiðistjórnunarkerfinu?

Breytingar á lögum um stjórn fiskveiða er annað tveggja stórmála sem formenn ríkisstjórnarflokkanna leggja ríka áherslu á að klárað verði í vor. Hitt er gerð kjarasamninga.

Fiskveiðistjórnunarmálið hefur verið til meðferðar í sjávarútvegs- og landbúnaðarráðuneytinu frá því í september þegar starfshópur um endurskoðun á lögum um stjórn fiskveiða skilaði ráðherra skýrslu.

Við upphaf þings í október var stefnt að því að frumvarp til breytinga yrði lagt fram í haust. Vinnan hefur tafist og í lok janúar lýsti Jón Bjarnason, sjávarútvegs- og landbúnaðarráðherra, yfir að frumvarpið yrði lagt fram í febrúar.

Líkt og rakið er í hliðardálki eru markmið ríkisstjórnarinnar með endurskoðun fiskveiðistjórnunarkerfisins nokkur. Eindrægni er um þau milli flokkanna en ágreiningur um leiðir og hve langt eigi að ganga í einstökum atriðum. Þar steytir helst á innköllun aflaheimilda. Samfylkingin vill ganga mun lengra í þeim efnum heldur en VG.

Upplýst var í Fréttablaðinu í síðustu viku að í frumvarpsdrögum væri miðað við að innköllun aflaheimilda yrði háttað þannig að eftir tíu til fimmtán ár yrðu um fimmtán prósent heimilda í botnfisktegundum komin í svokallaða potta.

Þetta eru þau viðmið sem einkum VG hefur lagt upp með. Samkvæmt heimildum Fréttablaðsins eru þau nokkuð fjarri því sem Samfylkingin telur viðunandi. Í þeim flokki er raunar ríkur vilji til að innkalla/fyrna hvert einasta tonn og endurráðstafa.

Frétt Fréttablaðsins vakti hörð viðbrögð í ólíkum fylkingum. Talsmenn útvegsmanna sögðu stöðugleika í greininni stefnt í voða og fylgjendur algjörrar innköllunar lýstu miklum vonbrigðum með að ekki ætti að ganga lengra.

Hugsanlegt er að Jóni Bjarnasyni takist að sigla málinu í höfn með því að fara bil beggja og fá menn til að fallast á málamiðlun en ólíklegt verður að teljast að markmiðið um að skapa sátt meðal þjóðarinnar náist nokkurn tíma.

bjorn@frettabladid.is