Það væri góð jólagjöf

Nú er Hjálparstarf kirkjunnar að safna fyrir neyðarhjálp í Austur-Afríku og er sú hjálp unnin í samstarfi við ACT Alliance, alþjóðleg neyðar- og þróunarsamtök. Á þeim vettvangi er krafan um fagleg vinnubrögð og samstarf mjög mikil. Aðilar sem sinna slíkri hjálp skipta með sér verkum og sinna mismunandi hópum og þáttum hjálparstarfsins.

Sömu lögmál gilda í hjálparstarfi á Íslandi. Sem betur fer eru vandamálin sem blasa við annars eðlis en nauðsynlegt er að skipuleggja starfið vel, skipta með sér verkum og líta til heildarhagsmuna þeirra sem njóta aðstoðar.

Hjálparstarfið tók á þessu ári upp kortaleiðina í mataraðstoð, um leið var ráðgjafaþátturinn aukinn til muna. Kortin eru inneignarkort sem hægt er að nota í matvöruverslunum. Tekin var upp einstaklings- og fjölskylduráðgjöf, fjármálaráðgjöf, matreiðslunámskeið og sjálfstyrkingarnámskeið. Öll ráðgjöf er veitt án endurgjalds.

Þeir sem sækja um aðstoð þurfa að koma með gögn um tekjur og gjöld og síðan er neysluviðmið Umboðsmanns skuldara notað sem viðmið um hverjir geta fengið aðstoð. Þar sem kortaleiðin er dýrari reyndist nauðsynlegt að takmarka hópinn á höfuðborgarsvæðinu við barnafjölskyldur enda eru tvö önnur samtök að sinna mataraðstoð þar. En annars staðar á landinu geta allir fengið inneignarkortin.

Hjálparstarfið veitir fjölbreytta aðstoð aðra en mataraðstoð og er hún öllum opin, má þar nefna stuðning við ungmenni í framhaldsskóla, vegna lyfjakostnaðar, tómstundaiðkunar barna og skólagöngu.

Hjálparstarfið hefur í gegnum árin átt gott samstarf við marga aðila og í jólaaðstoð ársins var gott samstarf við Rauða krossinn og margar mæðrastyrksnefndir. Öll hjálparsamtök vinna gott starf og vilja vel en nauðsynlegt er að skipta með sér verkum og líta til heildarhagsmuna. Ekki er víst að allir geti fallist á nákvæmlega sömu starfsaðferðir en að ræða saman og koma heildarskipulagi á hjálparstarfið er nauðsynlegt og ber að stefna að á nýju ári. Það væri góð jólagjöf til þjóðarinnar.

Gleðileg jól.