Allir vinna – áfram

Eitt af því jákvæðasta sem komið hefur frá sitjandi ríkisstjórn og skattayfirvöldum gagnvart almenningi er tvímælalaust átaksverkefnið Allir vinna. Það hefur m.a. falist í því að íbúðareigendur sem ráðist hafa í viðhalds- eða byggingarframkvæmdir á húsum sínum eða íbúðum á síðustu tveimur árum hafa notið 100% endurgreiðslu á virðisaukaskatti af vinnu. Einnig hafa sömu eigendur átt rétt á umtalsverðri lækkun á skattstofni sínum að ákveðnu marki.

Ég hef fundið að þessi skattalega hvatning hefur skilað miklum árangri. Árangurinn felst m.a. í auknum vilja íbúðareigenda til að leggja út í kostnaðarsamar viðhaldsframkvæmdir sem leitt hafa af sér stóraukin verkefni fyrir byggingaverktaka. Umrædd verkefni hafa verið raunverulegt mótvægi við deyfðina sem byggingaverktakar á fasteignamarkaði hafa búið við undanfarið. Þessi velta hefur verið uppi á borðum, hún er talin fram og stuðlar þannig að heilbrigðari viðskiptaháttum. Það er líka jákvætt.

Ástand fjölbýlishúsa er mjög misjafnt. Eldri húsin þurfa mörg hver á viðhaldi að halda sem allra fyrst, þau liggja beinlínis undir skemmdum. Það liggur fyrir að fjárhagsleg staða eigenda er líka mjög misjöfn og mörgum veitir ekki af stuðningi af þessu tagi. Í ljósi þessa hvet ég ríkisstjórnina og þingmenn til að framlengja umrætt átak.