Vill auðlindir til umhverfisráðuneytis

Flokksráð Vinstrihreyfingarinnar - græns framboðs lýstir yfir stuðningi við ríkisstjórn Vinstri grænna og Samfylkingarinnar og segir ótvíræðan árangur hafa náðst í efnahagsmálum þjóðarinnar. Sá árangur sé í fyllsta samræmi við stefnu flokksins í ýmsum málum.

Flokksráðið vill að umsýsla auðlindamála færist til umhverfisráðuneytisins, enda sé það í samræmi við stefnu flokksins og samstarfsyfirlýsingu ríkisstjórnarinnar. Efla þurfi starfsemi Umhverfisstofnunar og taka til skoðunar þannig að hún njóti trausts sem eftirlits- og umsýslustofnun á sviðið umhverfismála.

Flokksráðið vill færa virkjanir í neðri hluta Þjórsár í biðflokk, en samkvæmt þingsályktunartillögu Katrínar Júlíusdóttur iðnaðarráðherra og Svandísar Svavarsdóttur umhverfisráðherra eru þær í nýtingarflokki.

Flokksráðið ítrekar fordæmingu sína á loftárásum Atlantshafsbandalagsins á Líbíu og vill að rannsóknarnefnd kanni aðdraganda þess að Ísland samþykkti aðgerðirnar. Þá lagði ráðið áherslu á að ríkisstjórnin stæði vörð um eign þjóðarinnar á orkuverum og orkuauðlindum.- kóp