Pétur tapaði andvirði tveggja jeppa

Pétur Blöndal, þingmaður Sjálfstæðisflokksins, segist hafa tapað að minnsta kosti andvirði tveggja bílverða með því að kaupa hlutabréf í Sæplasti fyrir 7,4 milljónir árið 1992. Sæplast varð svo að eign Atorku árið 2004 en fyrirtækið fór í þrot fimm árum seinna. Pétur segir að það bráðvanti reglur um gegnsæ hlutafélög. Það skorti allt traust til að hægt sé að byggja upp hlutabréfamarkaðinn.

Pétur vakti máls á þessu í tilefni af því að tilkynnt hefði verið að Hagar, móðurfélag fyrirtækja á borð við Bónus og Hagkaup, ætluðu á markað í desember. Pétur spurði á Alþingi í dag hvort efnahags- og viðskiptaráðherra gæti ráðlagt sér að kaupa hlut í Högum. „Hefur einhverju verið breytt í hlutafjárlögum eða ársreikningalögum sem segi mér að fyrirtækið verði ekki holað að innan eins og gerðist með Sæplast sem var nýsköpunarfyrirtæki. Ég fullyrði að það hefur ekkert verið gert," sagði Pétur.

Árni Páll Árnason, efnahags- og viðskiptaráðherra, sagðist ekki treysta sér til þess að ráðleggja Pétri hvort hann ætti að kaupa í högum eða ekki. Hins vegar lægi fyrir að það þyrfti að breyta ýmsu til að auka tiltrú í Kauphallarviðskiptum. „Það er mjög mikilvægt að hertar yfirtökureglur verði virtar og að menn gangi ekki á svig við þær eins og gerðist á árunum fyrir hrun," sagði Árni Páll. Þá sé gríðarlega mikilvægt að réttur minnihluta í hlutafélögum sé virtur. „Við viljum ekki gera Kauphöllina að musteri ræningja eins og hún var á árum fyrir hrun," sagði Árni Páll.

Pétur Blöndal sagði að 55 þúsund heimili hefðu tapað samtals 80 milljörðum í hlutabréfum einmitt með sama hætti og hann tapaði á Sæplasti. Hann væri nú búinn að flytja frumvarp í þrígang um gegnsæ hlutafélög og það hefði enn ekki komist í gegn.