Brotist inn hjá Hugleiki

Brotist var inn hjá Hugleiki Dagssyni, listamanni, í gærkvöldi og voru tvær tölvur hafðar á brott ásamt hljómgræjum og flakkara.

Hugleikur segir allt sitt efni vera inni á tölvunum; hálfskrifaðar bækur, drög að kvikmyndum, sjónvarpsþáttum og leikritum en margir Íslendingar hafa birt auglýsingar á fésbókarsíðum sínum í þeirri von að það hjálpi honum að endurheimta efnið.

Hugleikur segir skilaboð hafa verið send í undirheima Reykjavíkur og hann vonist til að sú tilraun beri árangur.

Hann tekur fram að hann sé alls ekki í hefndarhug, en það sé mjög mikilvægt að hann fái gráu MacPro tölvuna sína með Star Wars límmiðunum til baka. Framtíð gríns á Íslandi velti á því.