Ólafur hefur áhyggjur af siðferðisvanda stjórnvalda

„Ég hef gríðarlegar áhyggjur af því að þetta mál lendi í höndum stjórnmálamanna sem hafi mikinn siðferðisvanda í málinu," segir Ólafur Elíasson, sem var hluti af InDefence hópnum. Hópurinn barðist gegn fyrstu nauðungarsamningunum í málinu og stóð fyrir undirskriftasöfnun um að þjóðin hafnaði þeim.

„Ef við tökum sem dæmi Steingrím J. Sigfússon þá er hann með þá stöðu í málinu að það yrði afar þægilegt fyrir hans pólitísku stöðu að þetta mál færi illa og yrði kostnaðarsamt fyrir íslensku þjóðina. Hann hefur alla vega ekki mikinn hvata gagnvart sínum pólitíska ferli að reka þetta mál með hagsmuni þjóðarinnar í forgrunni," segir Ólafur. Það sé alveg augljóst að Steingrímur hafi ekki gert mikið til að verja hagsmuni Íslendinga í þessu máli hingað til.

„Sama vil ég leyfa mér að segja um utanríkisráðhera. Ég hef ekki orðið var við að hann hafi lyft litla fingri til að verja samningsstöðu okkar eða koma sjónarmiðum okkar Íslendinga á framfæri varðandi þetta Icesave mál. Þannig að málið er greinilega í mikilli klemmu hvað þetta varðar," segir Ólafur.

Ólafur segir að margir í InDefence hópnum hafi verið sáttir við afstöðu Árna Páls Árnasonar, efnahags- og viðskiptaráðherra, sem hefur haft þetta mál á sinni könnu. „Við teljum að hann hafi reynt að sigla þessu máli skynsamlega og styðjum hann heilshugar í hans málflutningi. Líklega er það eini raunverulegi pólitíski kosturinn að hann fái að halda áfram með málið," segir Ólafur og bætir því við að það væri sérkennilegt að fara að skipta um hest í miðri á núna þegar Árni Páll er búinn að vinna mikla grunnvinnu í málinu. Ólafur segir það vera skoðun sína að ef ríkisstjórnin hefði kynnt málið almennilega fyrir andstæðingunum og Evrópusambandinu þá hefði ESA aldrei farið í þennan leiðangur sem nú sé verið að leggja upp í.

Máli sínu til stuðnings segir Ólafur að íslensku neyðarlögin hafi tryggt hagsmuni Breta og Hollendinga mun betur en íslenskra sparifjáreigenda þar sem Bretar og Hollendingar fái allt greitt út í erlendri mynt. Íslendingar hafi hins vegar fengið tryggingar á íslenska krónu sem hafði hrunið um 30-40%. Jafnframt hafi íslenskir lífeyrissjóðir og íslenski seðlabankinn tapað á þessari ráðstöfun í neyðarlögunum, þar sem innistæðurnar voru settar ofar kröfum þeirra.

Ólafur bendir jafnframt á að dómur EFTA í málinu gegn Íslandi gæti haft mikið fordæmisgildi þar sem Hollendingar eigi sjálfir Icesave banka, ING bankann, sem hafi safnað 60 milljörðum evra af erlendu sparifé. „Við sjáum enga ástæðu fyrir Breta og Hollendinga að vilja loka sig inni í þeirri stöðu að geta ekki gripið til sömu ráðstafana og Íslendingar, lendi þeir í sömu stöðu," segir Árni Páll. Þetta hafi enginn ráðherra bent á nema Árni Páll. „Það að íslenskir ráðamenn, að Árna Páli undanskildum, hafi ekki flutt þennan málflutning erlendis segir mér að það sé augljóst að siðferðisvandi sé að þvælast fyrir þeim," segir Ólafur.

Ólafur tekur skýrt fram að þetta séu sínar skoðanir en segir jafnframt að InDefence fundi nú um málið og muni senda frá sér fréttatilkynningu á næstunni.