Enn barist við eldinn

„Það er verið að berjast við þetta. Það er allt tiltækt lið á staðnum og jafnframt var aukamannskapur kallaður út. Þeir eru að vinna í þessu," segir slökkviliðsmaður sem Vísir talaði við í nótt. Eldur kviknaði á svæði Hringrásar í Sundahöfn um þrjúleytið í nótt.

Slökkviliðsmaðurinn segir jafnframt að mikinn reyk leggi frá staðnum. Eldurinn sé í dekkjarhrúgu, á sama stað og eldur kom upp fyrir sjö árum.

Þegar eldurinn kom upp hjá Hringrás árið 2004 þurfti að rýma nærliggjandi hús vegna hættu af eldinum og reyk. Nú eru vindáttir hins vegar hagstæðari.