Sonurinn sagður vera goðumlíkur leiðtogi

Kim Jong-un tekur við einu einangraðasta og fátækasta ríki heims af föður sínum. Her landsins er hins vegar fjölmennur og Norður-Kórea telst formlega vera kjarnorkuveldi, þótt lítið sé vitað um raunverulega getu landsins í hernaði.

Ríkisfjölmiðlarnir í Norður-Kóreu fóru strax í gær á fullt við að búa til goðumlíka mynd af Kim Jong-un, hinum 27 eða 28 ára gamla syni Kim Jong-il, sem nú er tekinn við af föður sínum sem leiðtogi í landinu.

Honum er lýst sem mikilmenni, sagður „fæddur af sól“ og fullyrt að hann verði „andlegur máttarstólpi og vonarviti“ bæði þjóðar og hers. Ungmenni landsins eru sögð „brennandi í trú og vilja til að sýna Kim Jong-un hollustu“.

Fátt er samt vitað um raunverulega stöðu hans meðal gömlu valdaklíkunnar og æðstu yfirmanna hersins, sem gætu hugsanlega vantreyst þessum unga manni sem gerður var að háttsettum herforingja án minnstu reynslu.

Herinn er í senn valdamesta stofnun landsins og stærsti atvinnurekandi landsins. Um fjórðungur þjóðarinnar er í vinnu hjá hernum og 40 prósent af þjóðarútgjöldum fara í herinn.

Þetta er fjórði fjölmennasti her heims og þótt herbúnaðurinn sé kominn töluvert til ára sinna telst Norður-Kórea núorðið til kjarnorkuvelda. Það gerðist árið 2006 þegar Norður-Kóreumenn sprengdu fyrst kjarnorkusprengju í tilraunaskyni. Þeir gerðu síðan aðra tilraun árið 2009, en fátt er vitað um raunverulega getu þeirra til að smíða kjarnorkuvopn.

Þó er talið að Norður-Kóreumenn eigi nú nóg af geislavirku efni til að nota í sex eða sjö kjarnorkusprengjur. Þeir hafa einnig gert tilraunir með flugskeyti sem hægt væri að nota til að skjóta kjarnorkusprengjum til Suður-Kóreu eða Japans.

Íbúum þessara nágrannaríkja er því engan veginn rótt, nú þegar leiðtogaskiptin fara fram. Samt eru ónotin engan veginn jafn mikil nú og árið 1994 þegar Kim Jong-il tók við af föður sínum, Kim Il-sung. Fólk virðist treysta því að Norður-Kóreumenn hafi ekki áhuga á kostnaðarsömu stríði, sem myndi bitna illa á þjóðinni, sem er ein fátækasta þjóð heims.

„Það er ólíklegt að Norður-Kórea vilji fara út í algert stríð,“ segir Kim Jung Yeun, starfsmaður á ferðaskrifstofu í Suður-Kóreu.

Bandarískir ráðamenn vilja að kjarnorkueftirlit Sameinuðu þjóðanna fái sem fyrst heimild til að fara til Norður-Kóreu í von um að geta aðstoðað hinn nýja leiðtoga við að losa sig við kjarnorkuvopnin.

„Við munum halda áfram að þrýsta á þá um að standa við alþjóðlegar skuldbindingar sínar,“ sagði Jay Carney, talsmaður Bandaríkjaforseta. „Við munum dæma Norður-Kóreustjórn á sama hátt og við höfum ævinlega gert: af verkum hennar.“ gudsteinn@frettabladid.is